Дарья Андреевна Томская - Чаайка Дарья

Томская Дария Андреевна 1913 сыллаахха Эҥэ нэһилиэгэр, Таастаах өтөҕөр төрөөбүтэ. Кини бу талаана ийэтиттэн уонна тастыҥ убайыттан Михаил Бурцевтан бэриллибитэ. Ийэтэ норуот ырыатын уонна бэйэтэ айбыт олоҥхотун олус үчүгэйдик толороро үһү. Оҕо эрдэҕиттэн олоҥхону олус сөбүлүүрэ, ол са5ана Эҥэ нэһилиэгэр уонча олоҥхоһут баара. Кинилэртэн Егор Горохов – Сытыкый саамай улахан, сөҥ куоластааҕынан, дириҥ ис хоһоонноох олоҥхолооҕунан биллэрэ.

Айылҕаттан айдарыылаах Даарыйа оҕо эрдэҕиттэн биирдэ тылын истээт, тылын барытын үүт-үкчү хатылыыра, кэнники бэйэтэ тойугу, норуот ырыатын, олоҥхону айарын саҕалаабыта. Сүүрбэ сааһыттан олоҥхо дьоро киэһэлэрин төрүттүүр биллэр-көстөр олоҥхоһуттар репертуардарыттан сөбүлээбитин үтүктэн олоҥхолуур идэлэммит. Ол курдук Е.Горохов «Ньургун Боотур», «Кулун Куллустуур», А.Н. Горохов «Саһыл улаан аттаах Сандалы Бэргэн», И.Н. Потапов «Эрбэҕэр эрчимнээх Элитэр Бэргэн», А.И. Томская «Көмүс Мөкүлүкээн оҕонньор», «Элгээн Иэйэхсит эмээхсин», таайа М.А. Бурцев «Хаан илбистээн бухатыыр», ийэтэ Е.А. Бурцева «Омуннаайы бухатыыр» уонна «Эллэй Баатыр» диэн олоҥхолорун сөбүлээн, бэйэтин репертуарыгар ылынан, дьон-сэргэ ортотугар олоҥхолуур буолбут. 

Сүүрбэ биэс сааһыттан толорооччу быһыытынан биллэн барбыта. 1940 с. Фольклорист Афанасий Саввин Даарыйаны Верхоянскай оройуонун олонхоһуттарынан испиэһэгэр биир күүстээх толорооччу быһыытынан киллэрбитэ. Кини кэпсииринэн сэрии сылларыгар 1941 с-тан ыла элбэх киһи мустубут сиригэр ыллаабат буолбута, бэйэтэ-бэйэтигэр эрэ ыллыыра. Ол курдук 40-ча сыл устата толорботоҕо. Онтон 1980-81 с.с. киниэхэ Дьааҥы сахалара олоҥхону уонна норуот ырыатын сатаан толорботтор диэбиттэрин себүлээбэккэ, бэйэтин олоҥхолорун толорор буолбута. Академик П.А. Слепцов Даарыйа олоҥхотун тылын докторскай диссертациятын көмүскүүрүгэр туттубута. Дария Томскаяҕа Саха сиригэр бастакынан 1988 сыллаахха «Россия искусствотыгар уонна культуратыгар үтүөлэрин иһин» РФ культура5а Министерствотын бочуоттаах знага иҥэриллибитэ.

Д.А. Томская толорууларын ТЛИ Институтугар, норуот айымньытын Дьиэтигэр, радио-телевидение компаниятыгар хас да төгүллээн кэрэхсээн истибиттэрэ. Кини толоруутун сиэрэ-туома, матыыбын арааһа, олоҥхотун эгэлгэтэ дьиҥ олоҥхоһуттар үгэстэригэр чугас турар.